Ўзбекистон 216 26.04.2019 10:38:41

Шавкат Мирзиёев Хитой парламенти раҳбари билан учрашди

Шавкат Мирзиёев Хитой парламенти раҳбари билан учрашди

Ўзбекистон Республикаси Президенти Шавкат Мирзиёев 26 апрель куни Пекинда Бутунхитой халқ вакиллари кенгаши Доимий қўмитаси раиси Ли Чжаньшу билан учрашди. Бу ҳақда Президент матбуот хизмат хабар берди. Давлатимиз раҳбари "Бир макон, бир йўл" иккинчи халқаро форумининг ўтказилиши ҳамда унинг доирасида ХХР Раиси Си Цзиньпин илгари сурган ташаббусларнинг амалга оширилиши халқаро ва минтақавий ҳамкорликни ривожлантиришга, кенг минтақамизда дўстлик, яхши қўшничилик ва ўзаро англашувни мустаҳкамлашга хизмат қилишини таъкидлади. Кеча Хитой Халқ Республикаси Раиси билан ўтган учрашувда мамлакатларимиз ҳамкорлигининг янги истиқболлари белгилаб олингани, улар икки давлат ўртасидаги ҳар томонлама стратегик шериклик муносабатларини янада мустаҳкамлашга хизмат қилиши қайд этилди. Ли Чжаньшу мамлакатларимиз икки томонлама муносабатларда эришган юксак даражани катта мамнуният билан қайд этди. Кейинги йилларда мамлакатларимиз ўртасидаги савдо-иқтисодий, инвестициявий, молиявий, маданий-гуманитар ва кўплаб бошқа соҳалардаги алоқалар янада фаоллашгани алоҳида таъкидланди. Ўзбекистон ва Хитойнинг қонун чиқарувчи органлари ўртасида ҳамкорлик борасида ижобий тажриба тўпланган. Парламент делегацияларининг учрашувлари мунтазам ўтказилиб, бу борадаги шериклик изчил ривожланиб бормоқда. Учрашувда олий даражада эришилган келишувлар ижроси устидан парламент назоратини кучайтириш масалалари кўриб чиқилди. Бундан ташқари, парламентлараро мулоқот мамлакатларимиз ҳамкорлигини амалий мазмун билан бойитиш, янги дастур ва лойиҳаларни илгари суришга хизмат қилиши қайд этилди. Бутунхитой халқ вакиллари кенгаши Доимий қўмитаси раиси мамлакатларимиз ўртасида эришилган келишувларни амалга ошириш ва кенг кўламли шерикликни янада ривожлантиришга амалий ҳисса қўшишга тайёрлигини билдирди. Ли Чжаньшу мамлакатимизда янги босқичда амалга оширилаётган ижтимоий-иқтисодий ислоҳотларни, уларнинг реал натижалари ва самарадорлигини юксак баҳолади. Унинг фикрича, Ўзбекистон Президентининг сиёсати ва ислоҳотлари ўзининг миқёси ва мақсадларига кўра давлатимиз раҳбарини Хитойнинг буюк ислоҳотчиси Дэн Сяопинь билан таққослашга тўлиқ асос бўлади. Учрашув якунида парламентлараро алоқаларни фаоллаштириш ҳамда самарали ислоҳот ва янгиланишларни амалга ошириш борасидаги тажрибани чуқур ўрганиш мақсадида қўшма тадбирлар ўтказишга келишиб олинди.


Хитой парламенти

Мавзуга оид